खारी बिस्कीट

          संध्याकाळी लाल नारंगी झालेल्या आकाशात धुसर काही दिसत होते. लांबून काळ्या ठिपक्यांच्या रंगोळीप्रमाणे भासणाऱ्या पक्ष्यांच्या थव्याचे निरीक्षण सुरू होते. हातातला चहाचा कप बिस्कीटची वाट पाहत होता. वाफळलेल्या चहामध्ये बिस्कीटाने बुडी घेतली. लिहिण्यासाठी समोर एक विषय होता... खारी बिस्कीट.

          चित्रपटगृहात पाहिलेल्या खारी बिस्किटची आठवण झाली. लहान असो किंवा मोठे, स्वप्न पाहण्याचे स्वातंत्र्य आणि काल्पनिक विश्वात रंगून जायचं वरदान देवाने प्रत्येकाला दिले. त्याच आभासी विश्वावर एक कुटुंब, एक घर, एक गाव किंवा हे विश्व चालतं याची जाणीव चित्रपटातील पात्र पाहून होत होती.

          आपले शरीर आणि इंद्रिये अशी अस्थिर स्वप्न स्थिर करण्यासाठी असतात. सत्यात आणण्यासाठी असतात. कानांनी ती ऐकलेली असतात. नाकपुड्यात त्यांचा दरवळ साठवता येतो. डोळ्यात ती पूर्ण होताना दिसतात. जिभेने त्याच कौतुक होत तर स्पर्शाने ती स्मरणात राहतात. याची सुरवात कुठे होते माहिती आहे ? ही जादू मनात कुठल्यातरी कोपऱ्यात जपून ठेवलेली असते. जेव्हा त्या मनाची कवाडे उघडली जातात, तेव्हा अशा खऱ्या, खोट्या आभासी स्वप्नाची एन्ट्री व्हायला सुरवात होते. सभोवती होणारी अदलाबदल तेव्हा आपोआप अंधुक होत जाते किंवा आपण ती नजरेआड करतो. पण हो या गोष्टीची जाणीव करून देणारा कोणी तरी आपल्याला वारंवार या प्रवासात भेटत असतो. तरीही ती स्वप्न पूर्ण करण्याचा आणि आपल्या डोळ्यात साठवण्याचा हट्ट आपला काही सुटत नाही मग ते स्वतः साठी पाहिलेलं असो किंवा दुसऱ्यासाठी पाहिलेलं स्वप्न.

            साध्या सरळ आणि बेताची परिस्थिती असलेल्या कुटुंबाची गोष्ट. स्वप्नांचा पाठलाग करणाऱ्या अंध बहिणीची ही कथा. कधी क्षुल्लक तर कधी मौल्यवान वाटणाऱ्या इच्छा आकांशाची कथा. बहिणीची स्वप्न पूर्ण करणारा भाऊ. आईने जाता जाता दिलेला कानमंत्र “ ती आपली प्रिन्सेस आहे, तिला फक्त चांगल्या गोष्टी दाखवायच्या “ हे वाक्य समाजात दडलेल्या अप्रिय रूपाची जाणीव करून देते.

बहीणीच्या स्वप्नांचा पाठलाग करताना “ विमानाने केलेला प्रवास येताना पायी चालत चालत कसा संपला “ खोटं होत ना सगळं “ या बहिणीच्या वाक्यावर भावाचे गहिवरणे प्रेक्षकांना भावुक करून जाते.

        “Better luck next time” हे त्यांना लागणाऱ्या लॉटरीच्या तिकीटावरच वाक्य आपल्याला गुडलक वर विश्वास ठेवण्यासाठी भाग पाडते. कसे माहिती आहे ? कमी खर्चात सलमान, शाहरुख आणि सचिनची भेट. आपलं गुडलक त्यांना ही मिळावं म्हणून केलेली धडपड. कदाचित बुद्धीला पटणार नाही पण मनाला नक्कीच पटेल. न पाहता वर्ल्ड कप जिंकण्याच दृश्य रंगवून सांगण्याचे आणि ते मैदानावर जाऊन पाहण्याचे धाडस ही स्वप्न पूर्ण करण्याची धडपड पूर्ण चित्रपटात दिसते.

          इथे लोक खोट बोलतात. खोट्या आशेवर राहतात. त्यासाठी ती राबतात. रडतात. हसतात. आपली सगळी जिंदगी काढतात आणि हे ही तितकेच खरे आहे जोपर्यन्त त्या आशेवर आहेत तोपर्यंत त्यांचे जग सुरू आहे. Better luck next time हे वाक्य आपल्याला आपल्याच रोजच्या कटकटीतुन पुढे जाण्याच बळ देते आणि आपण लगेच स्वतः ला त्यासोबत रिलेट करू लागतो.

             “ Better luck next time “ लिहिलेलं स्क्रॅच कार्ड बरेचदा आपल्याला ही येत, तरीही स्वप्नांना पूर्ण करता करता कधी सेंच्युरी होते कळत नाही. आपले स्वप्नाचे विमान उंच उडवायचे म्हणजे डोळस मनाची आणि गुडलकची सोबत. म्हणजेच खारी बिस्कीट. भावाबहिणीची शब्दात बांधलेली आणि डोळ्यात साठवलेली रंगीत स्वप्नाची माळ जपत चित्रपटाचा शेवट होतो.